大佬要同人溝通

今朝收到一個讀者既email，很開心佢喜歡我既愚作。老實講，計數佬我只懂得計數，一向都冇乜文彩，以前寫既野，都係以一個粗人講故仔咁講d事實同體驗出黎，承蒙大家會繼續支持啦。

呢位讀者話睇完我寫既野後開始對d上級manager有唔同既睇法，唔…唔知佢既睇法既向好既定既唔好既方面，不過小弟自己都做過o靚，又就算現在做到中高層(算係啦)，仍然認識唔少做緊「小孩」既朋友，不斷投訴自己既「大佬」如何如何的不是，如何如何的不濟。唔…

自己當然都暗罵過自己既大佬，當時又諗如果我係佢我一定會比佢做得更好。但當自己做左人大佬後，睇既野多左，遇到既事情多左複雜左，要顧累既野就更多，有時真係唔係一個大佬可以控制得到。

我唔識得教人點做大佬，不過我自己認為同下屬做事，最緊要都係溝通。

有時似住做大佬，開聲便叫人做呢樣做o個樣，完全唔加以解釋，好多時都會令下屬有hard feeling。可能你會問我係大佢係細，叫佢做就做啦講咁多，但好多時以佢地既知識，唔會明白呢個工作既目的及重要性，甚至認為是多餘，叫自己做埋d無謂野，咁個細既又點會落力去做？何況我試過當跟他們解釋後，班細既反而俾到d另類好建議俾我，連自己都諗唔到，結果佢有成功感又做得開心，我又得我所需，何樂而不為？

唔好以為講多浪費左自己時間，有時呢d時間係必須的。

另一方面，除左俾班細既知道你既目的，亦最好清楚講解你對佢地既要求。好多老闆都有一個通病，就係當自己既下屬係自己肚裡面既一條蟲，唔駛多講就知自己想點。大哥，你老婆/屋企人有時都需要你講多兩句，何況係你條o靚？

作為一個管理人，溝通係好重要，無論你點叻點醒都好，如果同下屬溝通出現嚴重問題，你想日後繼續成功都好難。