發豬瘟

呢個時代天災橫禍乜都有，真係一個動亂既時代，最近又爆「豬瘟」。

記得03年時沙士，我仲係逼科時捱緊騾仔，當時經濟跌落谷底，人心惶惶，做做下job都經常有人來電報料，說隔離某某組又炒了好幾個managers、seniors，自己就一路做一路驚，最怕電話嚮起，叫你即時返公司執野即走。

當時我一人負責3個listed companies既audits 同一個IPO既stub audit，全部都係我一向跟開，高經(i.e. senior manager)問我駛唔駛幫手，assign另一個senior 去in charge我既job，我當然一口拒絕，鬼咩，呢個時候show到你在公司既重要性及有用價值，要炒都未輪到自己啦。

就係咁，沙士時就安安然度過左。

至於今次…

唔知情況有冇上一次嚴重，不過今次有埋金融海嘯既影響，縱使「豬瘟」對香港既殺傷力冇上次沙士咁直接，仍然唔可以忽視…

可以做既，除左注意衛生及經常洗手外，就係經常「計數」。

講完又講，我現在經常都計算自己既「現金流」，touch wood在冇左家庭收入既情況下，又不用賤賣虧蝕資產的情況下，又在扣除經常性供款(如供車、供樓、還銀行貸款)的情況下，究竟可以捱幾耐。

當然呢個係消極既做法，理論上應該即極d搵收入，搵唔到工都應該做下生意去開源，不過唔係人人都有條件去即極，有時消極既做法唔係完全唔可取，唔知大家會唔會同意。

我可能想得太多

近排實在太忙碌，少左update自己個blog。

都冇法，在呢個金融海嘯下，人人都人心惶惶，怕冇左份工，冇左收入，現在經常聽到某某公司某某大集團又裁員，真係聽到心都實晒。

身邊既朋友有好多都失左業，都搵唔到野做，就好似我有一個以前在逼科一起做野既下屬，佢已經搵工搵左4個多月，到現在仲未搵到，真係替佢擔心，話晒佢老婆沒有工作，又有一子要養，現在都係靠過往積蓄過活。

又…我以前舊老頂，因太過頂唔順我舊老闆脾氣，一氣之下決定離開已工作十多年既公司，但最慘係佢辭職時是去年10月，而他已五十有多既中年人，在呢個時勢搵工，談何容易。有一天我跟他happy hour，他說現在d老闆話佢太過適合，over qualified喎，請唔起佢，佢其實都已經自降身價好多，但係在呢個時勢…唔係話你減價就一定有人請。

見到佢地，都不禁覺得自己有d走運，自己在去年海嘯黎之前轉左工，收入都有不錯既上調，縱使現在工作比以前忙之餘又唔係做得太開心，但在這個時勢，都已經好好運。

我絕對相信我現在若失業再搵工，就算搵到都未必有現在呢個價。

我現在經常計算，touchwood現在我兩公婆一齊失業冇晒收入，在不太影響現時生活水平，又不需即時變賣虧蝕資產(如股票、物業)，更不需向外借貸的情況下，我地手頭上既積蓄可以捱幾耐。

幸運地，手頭上既現金積蓄，都可以維持我地兩公婆十多個月既生活，但若然突然間生左一件出黎……

另一方面，我見到我舊老頂既事例，都會諗諗，到我好似佢50多歲，又遇另一次金融風暴，好似佢咁失左業，點算？

要知道經濟有一定循環，到時再遇大金融風暴，又有何出奇？到那時冇左份工，就更加之正常。

有時真係唔知道，點樣去manage呢個人生既risk，呢個risk其實有冇得manage，甚至有冇得hedge？

我可能想得太多囉…

管人學問 (2)

管人既學問，要講真係有排講，上次講完各人既性格、working style，今次講下人既質素，亦即係qualification。

以前做「逼科」，個個都係大學生、考晒專業試，大家有共同背景同學歷，唔駛多講、唔駛講得太明太白，你下屬都已經能get到你既意思，俗d講係知你想點。

但在一般commercial呢，由於成本問題，你既下屬未必擁有大學學歷、專業資格，你要佢地呢排人幫你做到你希望達成既quality，都又真係一大學問。唔係話有偏見，在公司同樣一個accountant，一個有大學學位同另一個只係F.5畢業既已經差好遠，刀下立見。而最重要既係前者比較有common sense。

咁既情況係唔係要你全部換過晒所有人？當然唔係，成本當然係第一大問題，高學歷既人流動性比較高又係另一問題，而有一d公司既老員工，你想郁佢，但佢地極得老闆信任，都唔係咁容易。

曾經有人提醒我，一個將領帶住班會打仗既戰仕，嬴了基本上係應該；反而帶住班普通平民都能戰勝，呢個先真正考功夫。

我現在面對既困難，就係後者。

其實以前公司都已經有同樣經驗，而現在就更考功力。

有時真係令人好攰好攰。

管人學問

自問以前工作主要都是落手落腳去做，當然以前身為manager，點都有機會管下人，但個job既最終結果，好多時都要自己親力親為先可以完成。

以前主力埋數，做成間上市公司既consolidation，點樣複雜既consolidation adjustments，都唔會難到我：縱使有困難，以我在「逼科」既connection，最終都可以解決。所以以前工作不太困難(縱使攪上市)。

但現在呢…

身為一個controller，已經有好多野唔駛落手落腳親自去做，衰d講你出句聲自然有人幫你做，但最大問題/學問是：你要如何管理先令下屬做到你希望做到既事。

管「人」，真係唔容易。

先唔講能力既問題，每個人既性格、working style唔同，有d人去好聲好氣同佢講要求佢，佢可能覺得你好蝦唔多聽你支笛、唔多尊重你，係要粗言粗語佢先有d怕你；有d人呢，你罵多兩句就同你講要生要死刀仔插大脾；總之對住唔同既人要用唔同既方法，但…用唔同既方法對不同既員工又會被人話大細超，偏心。

處理下屬之間既紛爭又係另一大學問，尢其是兩者都對你呢講係有極大利用價值既時候，正所謂手掌係肉手背又係肉，有時都唔知幫邊個好。唔係話誰是誰非既問題，而係點樣令件大事化少而佢地兩個仍會繼續幫你做野既問題。

你可能問收人工梗係要做野，點到佢say no？我又咁睇，當然樣樣都呼呼喝喝會容易做得多，但我又唔想，平時做野已經夠辛苦，何必要將個工作環境攪到咁冇士氣、咁唔開心？工作開心，有時反而係留住好員工既最佳武器。

但無可否認，一樣米養百樣人，呢個世界係有d人係欺善怕惡，所以在上位既，與某d下屬保持一定距離係必須既，官威，有時係無可避免。

管「人」對我黎講都係要不斷去學，對住唔同既人會令自己有唔同既經驗，可能對一個管理人黎講，係一個必經階段。